Япон улсын баруун өмнөд  хэсэг, Кумамото бүсэд пүрэв гарагийн орой 6.5 магнитудын хүчтэй газар хөдлөлт болж, 9 хүн амь насаа алдаж, мянга гаруй хүн гэмтсэн байна. Газар хөдлөлтөөс улбаалж 44 мянган хүнийг нүүлгэн шилжүүлсэн бөгөөд газар хөдлөлтийн дараах чичиргээ үргэлжилсээр байна.

Пүрэв гарагийн орой 6.5 магнитудын хүчтэй газар хөдлөлт болсон учраас олон мянган хүн айж сандран баасан гарагт шилжих шөнө гадаа хоножээ. Албаны хүмүүс 44 мянган хүнийг нүүлгэн шилжүүлсэн, газар хөдлөлтийн үеэр 1000 гаруй хүн гэмтэж бэртсэн, 9 хүн амь насаа алдсан гэж мэдээлж байна.

Газар хөдлөлт орон нутгийн цагаар 21 цаг 26 минутанд, газрын гүнд 11 кмт болсон байна. Газар хөдлөлийн хүч их байсан ч цунами болох тухай ямар нэг анхааруулга үүсээгүй байна. Гурван цаг хагасын дараа буюу баасан гарагийн 00 цаг 03 миунтанд Кумамото орчимд дахин 6.4 магнитудын хүчтэй газар хөдлөлт, 10 кмийн гүнд болсон байна. Японы албаны хүмүүс 6 магнитудын хүчтэй чичиргээ долоо хоногийн турш үргэжилнэ гэж мэдэгдэж байна. Тийм ч учраас тус бүс дэх үйлдвэрүүд үйл ажиллагаагаа зогсоогоод байна. Тухайлахад Хонда мотор компани мотоциклийн үйлдвэрээ, Брижстон компани дугуйны үйлдвэрээ, Сони компани зургийн мэдрэгчийн үйлдвэрээ, Мицубиши Электрик компани, шингэн кристал дэлгэцний үйлдвэрээ тус тус хаажээ.  Тус бүсийн түүхэн дэх хамгийн хүчтэй газар хөдлөлөөс улбаалж 11 мянган айл өрхийн цахилгаан тасарч, 58 мянган хүн ундны усгүй болжээ. Мөн аюулгүй байдлын үүднээс Кумамото хотын нэг бүсэд ахуйн хийг хязгаарлаад байна. Шинкансен буюу өндөр хурдны галт тэргийг зогсоосон ч газар хөдлөлтийн үеэр галт тэрэгний нэг чиргүүл төмөр замаас гарсан байна. Энэ үеэр зорчигчид, галт тэрэгний ажилтнууд гэмтээгүй байна. Мөн Кумамото  хотын нисэх буудлын үйл ажиллагаа зогссон байна. Газар хөдлөлт болсон тус нутагт Япон улс дахь цорын ганц онлайн буюу алсын удирдлагатай цөмийн цахилгаан станц байдаг. Сендай цөмийн цахилгаан станцын албаны хүмүүс тус станцын хоёр реакторт ямар нэгэн асуудал үүсээгүй, үйл ажиллагаа нь хэвийн үргэлжилж байна гэж мэдээлж байна. Газар хөдлөлтийн дараа 120 гаруй бага хүчтэй чичиргээ мэдрэгджээ.