Компьютерийн програм, гурван хэмжээст хэвлэлийн ачаар 3DPhotoworks компани шинэ зах зээлийг нээжээ. Тус компани үйл ажиллагаа явуулж эхлэх хүртэл харааны бэрхшээлтэй иргэдийн хувьд уран зураг, гэрэл зургийн ертөнцийн тухай ойлголт авна гэдэг тун хүнд байв. Тэгвэл 3DPhotoworks дэлхийд алдартай уран зураг, гэрэл зургуудыг гурван хэмжээсээр хэвлэж харааны бэрхшээлтэй иргэдэд урлагийн цоо шинэ ертөнцийг нээлээ. Үйл ажиллагааны гол дараалал нь хоёр хэмжээст зургуудыг сканнердаж, дижитал өгөгдөл болгож компьютерт оруулна. Тусгай програм мэргэжлийн дижитал хувиргагчдын гар ажиллагааны дараа тухайн өгөгдөлд хэмжээс бий болгоно. Энэхүү гурван хэмжээст зургийг харааны бэрхшээлтэй иргэдийн гарт мэдрүүлэхийн тулд технологийн дэвшил болох гурван хэмжээст принтерийг ашиглаж байна. Шинэ принтерийн ачаар уран зураг бүр 4.5 см хүртэлх гүнтэй хэвлэгджээ. Одоогийн байдлаар Давинчи, Ван Гох зэрэг дэлхийд алдартай зураачдын бүтээлүүд гурван хэмжээст болж хувираад байна.