MNBA CARES-"БИД НЭГ ГЭР БҮЛ" сайн үйлсийн аянд сагсан бөмбөг хэмээх их гэр бүлийнхэн халуун сэтгэлээр нэгдэж нэг цул болж чадлаа. Тоглолтыг нээж "Харанга" хамтлагийн дуучин, МУГЖ Х.Лхагвасүрэн "Батхишиг дүүдээ хурдан эдгээрэй, Хишиг ерөөе" хэмээн өөрийн "Толин хул" дуугаараа үзэгчдийг огшоосон бол реппер Цэцэ мөн найзынхаа төлөөх халуун сэтгэлээр хүрэлцэн ирж ая дуугаараа мэндчилсэн юм. Энэхүү сайн үйлсийн хандивын халз тоглолтын билетийн орлогоос 11,250,000 төгрөгийг цуглуулж чадсан бол сайн санаат хүмүүс 3,000,000 орчим төгрөгийн хандив өгч нийтдээ 14 орчим сая төгрөгийг цуглууллаа.  Халз тоглолтоос олсон бүх орлогыг Спортын мастер Б.Батхишигийн эмчилгээний зардалд зориулж, түүний аав Батцэнгэл, төрсөн дүү нарт нь Үндэсний шигшээ багийн тамирчид, дасгалжуулагчид, легионер тоглогчид, МҮСБХ-ны удирдлагууд тоглолтын дараа гардуулан өгсөн юм.

Энэхүү MNBA CARE-"БИД НЭГ БҮЛ" сайн үйлсийн аянд нэгдсэн сагсан бөмбөгийн үнэнч хөгжөөн дэмжигчид, Үндэсний шигшээ багийн баг тамирчид, легионер тоглогчид болон тэднийг тус тоглолтонд оролцлох зөвшөөрлийг олгосон багийн эзэд, "Ардчилал" сонины хамт олон, эрхэм сэтгүүлчид, Б.Батхишигийн багын найз нөхөд болон монголчууддаа талархал илэрхийлье. Үүний зэрэгцээ Монголын үндэсний сагсан бөмбөгийн холбоо Б.Батхишигт эмчилгээ нь амжилттай болж хурдан эдгэхийн сайхан ерөөлийг сагсан бөмбөг хэмээх их гэр бүлийнх нь нэрийн өмнөөс хүслээ. Б.Батхишигт хандив цуглуулах зорилгоор зохиосон Үндэсний шигшээ багийн тамирчид легионеруудын эсрэг хийсэн халз тоглолт 97:104-ийн харьцаатай легионеруудын ялалтаар өндөрлөсөн юм. Тоглолтын үеэр Монгол Улсын их сургуулийн харьяа "МУИС-МБМ", "SBL Хасын хүлэгүүд", "Танан гарьд", "Эрдэнэдрийлинг-Ригс" баг, Монголын хөлбөмбөгийн холбоо, Дорноговь аймгийн нутгийн зөвлөл, "D" клубийн ерөнхийлөгч Н.Бүрэнбат, "Москва" их дэлгүүр, Японы Аомори мужийн Засаг даргын орлогч Наруо Ютака, Монголын сэтгүүлчдийн нэгдсэн эвлэлийн дэд ерөнхийлөгч Х.Батхишиг тэргүүтэй хүмүүс хандив өргөсөн билээ.