Монголын оюутны спортын холбоо, Монголын цанын холбоо хамтран Монголын оюутны спортын “Универсиад 2015” их наадмын хүрээнд оюутан тамирчдын дунд цанын тэмцээнийг энэ сарын 26-27 нд Sky resort  цанын баазад амжилттай явуулж, аваргуудаа тодрууллаа. Тэмцээнд  зургаан их, дээд сургуулийн эрэгтэй 17, эмэгтэй 15 тамирчин өрсөлдсөн. 

Тэмцээний эхний өдөр эрэгтэй, эмэгтэй 1,5 км-ийн спринтийн уралдаан болж эрэгтэйчүүдийн төрөлд тэргүүн байрыг 4.05.84 амжилтаар ҮБТДС-ийн тамирчин Б.Бямбадорж, II  байрыг 4.07.98 амжилтаар ШУТИС-ийн тамирчин Амарсанаа, III  байранд 4.12.51 амжилтаар МУБИС-ийн тамирчин Б.Ачбадрах нар эзлэв. Харин эмэгтэйчүүдийн төрөлд аваргын алтан медалийг 5.00.47 амжилтаар ҮБТДС-ийн тамирчин Ариунтунгалаг, мөнгөн медалийг  5.30.14 секунд уралдаж “Мон-Алтиус” БТДС-ийн тамирчин Дэлгэрмаа, хүрэл медалийг  5.48.17 амжилтаар МУБИС-ийн тамирчин Энхтуул хүртлээ. 

Гурван  км-ийн эрэгтэйчүүдийн буухиа багийн уралдаанд Мон-Алтиус БТДС, МУБИС, ҮБТДС-иуд эхний гурван  байр, эмэгтэйчүүдийн төрөлд МУБИС, ҮБТДС, ШУТИС нар шалгарч алт, мөнгө, хүрэл медалийн эзэд болов.
Тэмцээний хоёр дахь өдөр холын зайн уралдаанууд болсон бөгөөд эмэгтэй 5 км, эрэгтэй 10 км-ийн зайд уралдсан. Энэ төрөлд эрэгтэй 17 тамирчин, эмэгтэй 15 тамирчин өрсөлдөж, эрэгтэйчүүдийн 10 км-ийн шигшээ уралдаанд 8 тамирчин шалгарч, 35.32.61 секундын амжилтаар өвлийн универсиад наадмын оролцогч МУБИС-ийн тамирчин Б.Ачбадрах тэргүүлж, 36.25.41 амжилтаар ҮБТДС-ийн тамирчин Бямбадорж  удаах байр, 37.25.35 амжилтаар ШУТИС-ийн тамирчин Амарсанаа гутгаар байранд шалгарсан. Эмэгтэйчүүдийн уралдаан мөн адил өрсөлдөөнтэй болж,  тэргүүн байрыг ҮБТДС-ийн оюутан Ариунтунгалаг 22.01.31, удаах байранд МУБИС-ийн тамирчин Энхтуул 22.39.03, гуравдугаар байранд “Мон-Алтиус” БТДС-ийн оюутан Дэлгэрмаа 23.05.80 амжилтаар  шалгарсан. 

Байгууллагын нэгдсэн дүнгээр 72 оноогоор МУБИС тэргүүн байр, 74 оноогоор ҮБТДС дэд байр, 119 оноогоор” Мон-Алтиус” БТДС гутгаар байр эзэлж “Универсиад 2015” их наадмын алт, мөнгө, хүрэл медаль, өргөмжлөл, Монголын цанын холбооны тусгай шагналаар шагнуулсан юм. Уг тэмцээнийг оюутнуудын дунд  өвлийн спортыг хөгжүүлэх үүднээс жил бүр уламжлан болгон зохион байгуулахаар боллоо.