Өнөөдөр ДБЭТ-т тив дэлхийд нэрээ дуурсгасан тус театрын гоцлол дуучин концерт тоглох гэж байна. Зөвхөн гоцлол дуучдын энэхүү тоглолтыг “Классико” гэж нэрлэжээ. Шилдэг гоцлол дуучдын дуу хоолойг нэг тайзнаас харахыг хүсвэл бямба гарагийн 17 цагт тоглолт эхэлнэ. Одоогоор тус театрт 30 гоцлол дуучин ажиллаж, театрын тайзнаа тоглож буй дууриудын гол дүрийг бүтээж, төрийн болон хүндэтгэлийн олон зуун концертонд тоглож, гадаад улс оронд Монгол улсын соёлын түвшинг харуулж, нэр хүндийг таниулж байна. Сүүлийн жилүүдэд манай гоцлол дуучид Австри, Итали, Турк, АНУ, БНСУ, БНХАУ, ОХУ, БНСУ-ын томоохон тайз, театруудад тоглож байгаа бөгөөд 2014 оны 11-р сард Большой театрт “Монголын алтан хоолойтнууд” бүрэн хэмжээний концерт тогложээ.

Түүх сөхвөл 1952 онд анх театрын даргын тушаалаар найрал дуучдаас 9 хүнийг сонгон гоцлол дуучнаар томилсноор гоцлол дуучдын хамт олон анх бүрэлджээ. Энэ үеэс хойш ОХУ, Болгар улсад суралцаж төгссөн 100 гаруй дуучид гоцлол дуучнаар ажиллаж байжээ. 1966 оноос манай дуучид олон улсын томоохон уралдаан тэмцээнүүдэд тасралтгүй амжилттай оролцож ирсэн бөгөөд "BBC Cardiff Singer of the World" уралдааны Дэд аварга, П.И.Чайковскийн нэрэмжит Олон улсын дуурийн дуулаачдын уралдааны Дэд байр, М.И.Глинкийн нэрэмжит олон улсын Тэргүүн байр, Дэд байр, Гутгаар байр, П.Домингогийн OPERALIA тэмцээний тэргүүн шагнал, Г.Свиридовын нэрэмжит олон улсын уралдааны Дэд байр, Г.Вишневскаягийн нэрэмжит уралдааны Дэд байр болон олон тусгай шагналуудыг хүртээд байгаа нь манай дуучдын ур чадварын үзүүлэлт юм.