АН-ын Гүйцэтгэх зөвлөлөөс гарсан шийдвэрийн дагуу АН-ын бүлэг өнөөдөр уг асуудлыг хэлэлцэж байна. Хэлэлцэж буй асуудлаар УИХ-ын гишүүн Д.Зоригт болон АН-ын Ерөнхий нарийн бичгийн дарга Л.Эрхэмбаяраас дараах тодруулгыг авлаа.

-Ерөнхий сайдыг эзгүй хойгуур уг асуудлыг хэлэлцсэн. Ерөнхий сайд ямар байр суурь илэрхийлсэн бэ?

Л.Эрхэмбаяр: Энэ асуудлаар Ерөнхий сайд өөрөө байр сууриа илэрхийлэх байх. Бүлгийн дэвшүүлсэн асуудлыг болон Гүйцэтгэх зөвлөлийн шийдвэрийг Ерөнхий сайд дэмжсэн. Манай намаас УИХ-д сууж байгаа намын гишүүдэд  АН-ын гишүүнийх нь хувьд үүрэг  өгсөн болохоос биш УИХ-ын гишүүнийх нь хувьд бид үүрэг өгөөгүй. АН өнөөдөр нэгдмэл бодлоготой байх ёстой учраас нэгдмэл байр сууринд хүрсэн.

-МАН-ын оронд ИЗНН-ыг оруулж ирнэ гэсэн үг үү?

Энэ асуудлаар одоохондоо бид хэлэлцээгүй байна. Хариулт өгөх боломжгүй байна.

-Хэрвээ биелүүлэхгүй гэвэл яах вэ? Ямар хариуцлага тооцох юм бэ? Одоо шийдэхгүй гэвэл намраас нааш шийдэгдэхгүй гэсэн үг үү?

Энэ асуудлаар ямар шийдвэр өгсөн гэвэл 7-р сарын 10-наас өмнө Засгийн газрын бүрэлдэхүүндээ өөрчлөлт оруул, ингэхдээ Засгийн газрыг огцруулахгүй, Засгийн газрын бүрэлдэхүүнд нь өөрчлөлт оруулах тухай л яригдана. АН-ын зүгээс бүх намуудтай гэрээ байгуулсан. Тиймээс энэ гэрээ хэвээрээ. Үлдсэн хугацаанд бусад намуудтай хамтраад ажиллана.

-АН-ын Гүйцэтгэх зөвлөлийн ирц ямар байсан бэ?

Гүйцэтгэх зөвлөл 27 гишүүнтэй. 18 гишүүн уг асуудлыг хэлэлцсэн. Ирцэд ямар нэг асуудал байгаагүй.

-МАН-тай нэг танхимд гар нийлж ажиллаж чадахгүй байсан гэж үзэж байгаа юм уу?

Д.Зоригт: Хоёр нам хамтрах гэрээ байгуулсан. Гэтэл МАН-ын зүгээс хуулийн төслүүдийг хойш татах, гацаах зэрэг олон асуудал гарч байгаа учраас үүнд АН-ын бүлэг сэтгэл дундуур байгаа.

Эх сурвалж: demparty.mn