Монгол Улсын Соёлын Гавьяат зүтгэлтэн, нэрт орчуулагч, дуун хөрвүүлэгч Ж.Гэндэндарамын “Билигт гүүш” шилдэг орчуулгын шагнал гардуулах арга хэмжээ өнөөдөр Гадаад хэргийн яамны ёслолын танхимд болов. Шагнал гардуулах арга хэмжээнд Боловсрол, соёл шинжлэх ухааны яамны дэд сайд Б.Тулга, Гадаад хэргийн яамны дэд сайд Н.Оюундарь нар болон Монголын оюуны соёлын хүндтэй төлөөлөгчид хүрэлцсэн ирсэн юм.

Энэ жил анх удаа олгогдож буй “Билигт гүүш” орчуулгын бүтээлд сүүлийн дөрвөн жилийн хугацаанд орчуулагдаж олны хүртээл болсон 21 орчуулагчийн 40 бүтээл өрсөлдлөө. “Билигт гүүш” шагналын анхны эзнээр Ф.М.Достоевскийн “Солиот”, Орхан Палиукын “Хар домог” романыг оруулсан нэрт орчуулагч Ц.Гомбосүрэн шалгарав. Тэрбээр “Солиот” романыг орос хэлнээс, “Хар домог”-ийг англи хэлнээс орчуулжээ.

Түүнд олгосон шагналыг цом, гурван сая төгрөг дагалдсан юм. “Билигт гүүш” орчуулгын бүтээлийн шагнал нь одоогийн жишгээр манай улсад уран зохиолын бүтээлийг хөхүүлэн дэмждэг шагналын дээд түвшингөөс дээгүүр байгаа. Шагнал нь Монголын Соёл Яруу Найргийн академийн дэргэдэх орон тооны бус зөвлөлөөс гаргасан шийдвэрийн дагуу олгох билгэдлийн цом, диплом 2500 ам.доллартай тэнцэх мөнгөн шагнал байх юм. Энэхүү мөнгөн шагналыг нэрт орчуулагч Ж.Гэндэндарам өөрөө санхүүжүүлж буй. “Билэгт гүүш” шагналын тусгай байрт орчуулагч Д.Болдбаатар, Ж.Нэргүй нар шалгарлаа.

Орчуулагч Д.Болдбаатар “Хятадын эртний сонгодог зохиол”, “Гурван улсын үлгэр” хятад хэлнээс орчуулсан роман, Афган гаралтай зохиолч Халед Хоссени “Цаасан шувуу наадуулагч”, “Мянган нарны цацраг”, “Уулсын цуурай” англи хэлнээс орчуулсан романаар, Ж.Нэргүй “Алтан ордоны яруу найраг” яруу найргийн, С.Есенин “Сонгомол шүлгүүд”, “Италийн сэргэн мандалтын үеийн туурвилууд” орос хэлнээс орчуулсан орчуулгын бүтээлээрээ тус тус хүртэв.

Тусгай шагналын эзэд тус бүр нэг сая төгрөгөөр шагнууллаа. Монголын Соёл, Яруу Найргийн академи, “Гэндэндарам сан” хамтран зохион байгуулж буй энэ шагнал  хоёр жил тутамд нэг удаа олгогдох юм.

                                                                                                               Г.Золзаяа