Содура хөвч тайгын охин. Түүний хүүхэд нас их тайгад өнгөрсөн ч хувь заяаны эрхээр их хоттой амьдралаа холбоно. Гэвч хотын амьдрал түүнд зохисонгүй. Эцэст нь сэтгэлдээ гунигтай, зүрхэндээ шархтай тайга руугаа буцдаг. Эргэж ирэхэд нь түүнийг тайгын нууцлаг амьдрал угтаж авах болно.

Харин цаашид ямар үйл явдал өрнөхийг үзэгч та бүхэн энэ сарын 20-ноос сонирхон үзэж болох нь. 2012 оноос зохиолоо бичиж, жил дамнан зураг авалтаар бүтээсэн “Содура” киноны нээлт удахгүй болно. Улаанбаатараас хотоос алс газар буй тайгын амьдрал, нууцлаг ертөнцийг мөнхлөн үлдээсэн энэ бүтээлд олон уран бүтээлч хөдөлмөр, цаг хугацаа их зарцуулжээ. 

“Содура”киноны зохиолыг С.Сумьяа, О.Эрдэнэ нар хамтран бичиж, UBS телевизийн найруулагч Б.Жаргалсайхан найруулжээ. Дүрүүдэд ардын жүжигчин П.Цэрэндагва, Д.Мэндбаяр, Ц.Батхуяг агсан, С.Болормаа, жүжигчин С.Ариунбямба, Ч.Очгэрэл, А.Өнөржаргал, О.Амгаланбаатар, Н.Оюунсүрэн нар тоглосон байна.

                                                                                                                  Г.Золзаяа