Латин Америкийн нэр хүндтэй кино наадамд зураглаач Д.Ангараг оролцож буй. Гвадалахара их сургууль, Мексикийн кино урлагийн сургууль, Соёл урлагийг дэмжих үндэсний зөвлөл нь хамтран  энэ сарын 6-12-нд зохион байгуулж буй уг наадамд тэрбээр АНУ-ын кино зураглаачдын холбооны урилгаар оролцож байгаа.

Тэрбээр “Монголын кино урлагийн өнөөгийн хөгжил” сэдвээр илтгэл тавьсан бөгөөд тус зураглаачдын холбооны гишүүдтэй хамтран Мексикийн кино урлагийн сургуулийн оюутнуудад сургалт зохион байгуулах гэнэ.

Зураглаач залуу цахим хуудастаа “Энэ наадамд Азиас бусад кино урлаг хөгжсөн олон улсын уран бүтээлч оролцдог юм байна. Манай уран бүтээлчид ирэх жилээс бүтээлээрээ оролцвол Азиас анхдагч болох учир нэлээд юм дуулгана даа” хэмээн бичжээ.

Испани хэл дээрх кинонуудын “Гвадалахара” хэмээх энэ олон улсын наадмыг 1986 оноос хойш жил бүрийн гуравдугаар сард зохион байгуулдаг болжээ.  

                                                                                                                                Г.Золзаяа