Монгол Улсад орчин үеийн мэргэжлийн театр байгуулагдсанаас хойш 80 гаруй жилийн түүхийг  үджээ.  Энэ хугацаанд теарт жүжгийн урлаг төрөл жанраа нэмж, дэлхийн хөгжилтэй хөл нийлүүлэн алхсаар байна. Өнгөрсөн долоо хоногт театрын тайзнаа Моно жүжгийн төрлөөр дэлхийн таван орны жүжигчид ур чадвар, сэтгэл зүрхээ шингээн үзэгч олондоо тоглолт үзүүлсэн юм.  Тэдний тоглосон жүжиг  өөр өөрийн гэсэн онцлогтой  байсан нь сэдвийн хувьд хайр, үхэл, амьдрал, шүтээн, харгислалын тухай өгүүлжээ. 

Энэ жилийн "Ялагчдын цуваа" 2018 Моно жүжгийн уралдаанд таван орны зургаан жүжигчин оролцсоноос АНУ-ын жүжигчин Бремнер дути "Kabare" жүжгээрээ тэргүүн байр эзэлсэн юм. Түүний тоглосон жүжигт Дэлхийн 2-р дайны үеийн харгислал, жүжигчдийг хэрхэн хорьж, сэтгэл санааны гутралд оруулж байгааг  харуулсан бөгөөд энэ дүрээрээ эрэгтэй, эмэгтэй гээд хэд хэдэн дүрийн хувиргалтыг маш чадварлаг үзүүлсэн байна.