Дэлхийн хамгийн томоохон корпорациудын нэг болох “Apple” корпорацийн үүсгэн байгуулагч домогт Стив Жобсын амьдралын талаарх бас нэгэн кино олны хүртээл болохоор болжээ. Киноны гол дүрийн жүжигчнийг сонгох гэж уран бүтээлчид нэлээдгүй хугацаа удсаны эцэст Их Британийн жүжигчин Кристиан Бэйлийг Стив Жобсын дүрд сонгосон бөгөөд зураг авалт ирэх сараас эхлэх гэнэ. Киноны гол дүрийг бүтээх жүжигчин Кристиан Бэйлийн хувьд Оскарын шагналт жүжигчин төдийгүй хамгийн сүүлд үзэгчдийн хүртээл болсон Бэтмэн киноны гол дүрийг бүтээсэн билээ.

Телевизийн “CNN” компанийн захирал асан, өдөр тутмын “Time” сэтгүүлийн редактор Уолтер Исааксоны бичсэн "Стив Жобс" хэмээх номоос уг киноны зохиолыг сэдэвлэжээ. 2011 оны аравдугаар сард худалдаанд гарсан уг номыг Стив Жобсоос авсан гучин ярилцлага, мөн түүний гэр бүлийн гишүүд, найз, хамт ажиллаж байсан хүмүүс болон өрсөлдөгчид голдуу хэдэн зуун хүнтэй хийсэн ярилцлагад тулгуурлан бичсэн байна. Шинэ кино ямар нэртэй байх, дэлгэцнээ хэдийд гарах нь одоогоор тодорхойгүй байна. 

Харин тус киноны зохиолыг бичсэн  зохиолч Аарон Соркин өмнө нь “Facebook” нийгмийн сүлжээг үүсгэн байгуулагч Марк Цукербургийн тухай киноны зохиолоор “Оскар” болон “Алтан бөмбөрцөг” шагналыг хүртэж байсан юм.