Өнгөрсөн онд нийслэл Улаанбаатар хотын түүх 375 жилийн ойн хүрээнд “Үйлсийн сайхан Улаанбаатар” мюзиклыг залуу уран бүтээлчдийг оролцуулан тавьсан. Энэхүү хөгжимт жүжигт бидний амьдарч буй өнөөгийн нийгэмд өдөр бүр, хором мөч тутамд бие биенээсээ шаарддаг хариуцлагын тухай өгүүлнэ. Хурдацтай өсөн нэмэгдэж буй хотын хөгжлийг дагаад товлосон цагтаа ирж, хэлсэн үгэндээ эзэн болж, хариуцаж авсан ажлаа цагт нь биелүүлдэг хүмүүс энэ хотын эд эс нь байх ёстой. Залуусыг хариуцлагатай нийгэмд уриалан дуудсан энэхүү жүжиг ч энэ жил ахин тавигдана. Бүр тодруулбал аравдугаар сарын 29-нд дахин тоглогдох гэж байна.  “Үйлсийн сайхан Улаанбаатар” буюу "UB I love you" хэмээх орчин үеийн мюзиклыг 2014 оны 10 сарын 28, 29-ны өдрүүдэд 19:00 цагаас Улаанбаатар Чуулгын тайзнаа хоёр өдөр үргэлжлүүлэн толилуулна. Энэ жил зохиолч Т.Нипонийн “Үйлсийн сайхан Улаанбаатар” буюу “UB I love you” мюзиклын гол дүрийг Universe best songs уралдааны Гран При шагналт, залуу дуучин А.Хишигдалай бүтээхээр боллоо.