ХБК-ийн төгөлдөр хуурын ангийн шилдэг оюутнуудын нэг Ү.Уртнасан Москвагийн Гнесины нэрэмжит Хөгжмийн академид суралцахаар болжээ. Тэрбээр энэ тухай баяртай мэдээгээ хуваалцаад “Ирэх долоо хоногт багтаад явчих байх” гэсэн юм. Өндөр шалгууртай сургуулийн шалгалтуудыг давж сурахаар уригдсан залуу хөгжимчин тус сургуульд амжилттай суралцаж төгссөн, эдүгээ ч нэр төртэй суралцаж буй цөөн монголчуудынхаа эгнээнд ийнхүү шилжив. Ү.Уртнасан бол манай улсад болсон Ф.Шопены нэрэмжит төгөлдөр хуурчдын олон улсын II уралдааны B ангиллын дэд байрын шагналт. Мөн тус уралдааны үзэгчдийн нэрэмжит шагналт оюутан. Өмнө нь эх орондоо болсон ардын жүжигчин С.Гончигсумлаагийн нэрэмжит өсвөрийн хөгжимчдийн уралдаанд III байр эзэлж байсан бол, Швейцарь улсад болсон П.И.Чайковскийн нэрэмжит өсвөрийн хөгжимчдийн олон улсын уралдаанд амжилттай оролцож П.И.Чайковскийн нэрэмжит Хөгжмийн төв сургуульд сурах эрхээр шагнуулж байсан шилдэг оюутан. Дашрамд дурдахад Ү.Уртнасан бол урлагийн гэр бүлийн гишүүн. Тэрбээр дуурийн гоцлооч, МУГЖ Х.Үнэнхүүгийн охин билээ.

Эх сурвалж: www.soyol-urlag.mn