П.И. Чайковскийн нэрэмжит Олон улсын XV уралдаанд АНУ, Франц, Герман, Испани, Өмнөд Солонгос, Хятад, Тайвань, Армен, Румын, Монгол, Литва зэрэг дэлхийн 14 орны төлөөлөл оролцлоо. Төгөлдөр хуур, хийл, морин хийл, гоцлол дуу гэсэн дөрвөн төрөлд ялагчаа тодруулсан юм.

П.И. Чайковскийн нэрэмжит Олон улсын XV уралдааны төгөлдөр хуурын төрөлд тэргүүн байрыг ОХУ-ын Дмитрий Маслеев, хоёрдугаар байрыг АНУ-ын Жорж Ли болон Литва улсын Лукас Генюшас, гуравдугаар байрыг ОХУ-ын Даниил Харитонов болон Сергей Редькин нар эзэллээ.

Хийлийн төрөлд тэргүүн байр тодорсонгүй. Хоёрдугаар байранд Тайванийн Цзэнь Юй Чень, гуравдугаар байранд ОХУ-ын Павел Милюков, Гайк Казазян болон Молдавын Александра Конунова нар эзэлжээ.

Морин хийлийн төрөлд тэргүүн байрыг Румын улсын Андрей Иониц, дэд байрыг ОХУ-ын Александр Рамм, гуравдугаар байрыг ОХУ-ын Александр Бузлов нар эзэлсэн байна.

П.И. Чайковскийн нэрэмжит Олон улсын XV уралдааны гоцлол дууны төрөлд тэргүүн байрыг Монгол Улсын баритон Ганбаатарын Ариунбаатар, ОХУ-ын сопран Юлия Маточкина, хоёрдугаар байрыг ОХУ-ын Светлана Москаленко, БНХАУ-ын Ван Чуаньюэ, удаах байрыг Арменийн Мане Галоян, Өмнөд Солонгосын Ю Хан Сын, ОХУ-ын Дмитрий Григорьев болон Антонина Весенина нар эзэллээ.  

Тус тэмцээнд тэргүүн байрыг 30.000 ам.доллар, хоёр, гуравдугаар байрыг 20, 10 мянган ам.доллар дагалддаг. Гранпри шагналыг 100.000 ам.доллар дагалддаг юм.  

П.И. Чайковскийн нэрэмжит Олон улсын XV уралдаанд байр эзэлж амжилттай оролцогсдын гала концерт 7 дугаар сарын 2-нд Москвагийн Их театрт болсон бол 3-нд Санкт-Петербургийн Марийнскийн театрт болно.

П.И. Чайковскийн нэрэмжит Олон улсын уралдаан нь 1958 оноос хойш дөрвөн жилд нэг удаа зохиогдсоор ирсэн бөгөөд энэ жилийн хувьд 6 дугаар сарын 15-30-ны өдрүүдэд Москва, Санкт-Петербург хотод амжилттай болж өндөрлөлөө.

Эх сурвалж: http://tass.ru/