Хүний биед өвчин үүсгэж байгаа нян, бичил биетний 90 орчим хувь нь бохир гараар дамждаг. Бидний дунд элбэг тохиолддог вирус гепатит А, Е, цусан суулга, вирусын гаралтай суулгалтад халдварууд, хоолны хордлого, цагаан хорхойтох зэрэг нь бохир гараар дамждаг. Мөн хүний томуугийн болон вирусын шинэ халдваруудаас сэргийлэхэд гарын ариун цэвэр нэн чухал болохыг ДЭМБ-аас олон нийтэд анхааруулсан байна. 

Бохир гарын арьсанд нян хэр удаан амьдрах вэ? 

Бохир гар нян вирусын амьдрах таатай орчин нь болдог. Гарт байгаа нянгийн 95% нь хумсны завсарт орогнодог. 

• Гэдэсний хижиг үүсгэгч 2-3 өдөр
• Цусан суулга үүсгэгч 3 хоног 
• Халдварт шар үүсгэгч олон хоног 
• Цагаан хорхойн өндөг хэдэн ч хоног байж чадна. 

Гараа хэрхэн зөв угаах вэ? 

Саван нь арьсны хир, хөлс, нян, вирус арилгах хамгийн энгийн найдвартай арга юм. Харин савангүй угаавал угаагүйтэй ижил.

Гараа зөв угаах 6 дарааллыг баримтлан дор хаяж 2 минутын турш сайтар савандаж угааж хэвшвэл бохир гарын олон өвчинд өртөхгүй байх боломжтой.