Энэ сарын 11-нд Говь-Алтай аймгийн Тонхил сумын Тамч багийн Дөрөлж хэмээх газар нутаглаж байсан малчны хотонд чоно орж 13 настай хүүхэд рүү нь дайрчээ. 

Чоныг тэр дор нь устгаж, дээжийг 12-ны өдөр аймгийн Мал эмнэлгийн ариун цэврийн лабораторид илгээжээ. Лабораторийн шинжилгээгээр мал, амьтны галзуу өвчин гэдэг нь баталгаажсан байна. Уг хэрэг гарсантай холбогдуулан тус аймгийн Тонхил сумын Засаг даргын захирамжаар хязгаарлалтын дэглэм тогтоосон ба аймгийн Мэргэжлийн хяналтын газраас ард иргэдийг сонор сэрэмжтэй байхыг анхааруулж байна. 

Харин хүүхдийн биеийн байдал тааруу байгаа ба одоогоор аймгийн Нэгдсэн эмнэлгийн Халдвартын тасагт гуравдахь өдрөө хэвтэн эмчлүүлж байгаа аж.