Нийслэлийн мэргэжлийн хяналтын газраас өнгөрсөн гуравдугаар сарын 12-наас дөрөвдүгээр сарын 20 хүртэл, саун бассейны газруудад шалгалт хийжээ. Шалгалтад Нийслэлийн нутаг дэвсгэрт үйл ажиллагаа явуулж буй 14 саун, долоон халуун ус, арван усан бассейн хамрагдсан байна. Сауны газруудаас 14.2% нь бага, 85.7% нь дунд эрсдэлтэй, усан бассейн, чийрэгжүүлэлтийн усан сангаас 50% нь бага эрсдэлтэй, 50% нь дунд эрсдэлтэй, “Халуун усны газруудаас 85.7% нь дунд, 14.2% нь их эрсдэлтэй гэж үнэлэгджээ.

Усан бассейн, чийрэгжүүлэх усан сангийн усанд гэдэсний бүлгийн савханцар илэрсэн нь тухай газрын ариун цэвэр, халдвар хамгааллын дэглэм хангалтгүй, үлдэгдэл хлор зөвшөөрөгдөх дээд хэмжээнээс бага гарсан аж. Энэ нь бассейны усыг байнгын эргэлтэд байлгах шахуурга, шүүлтүүр болон халдваргүйжүүлэлтийн тоног төхөөрөмжийн эргэлт, усан сангийн ус бүрэн солигдох хугацаа шаардлага хангахгүй байгаатай холбоотой аж.