ЭМЯ, Монгол Эм Импекс Концерн хамтран элэгний С вирусийн эмийн эмчилгээний иргэдээс гарах зардлыг тэглэх чиглэлээр хамтран ажиллах санамж бичигт оны өмнө гарын үсэг зурсан. Ингэснээр С вирусийг 99 хувийн үр дүнтэй эмчилдэг Дэлхийн эрүүл мэндийн байгууллагаас баталгаажуулсан Ледвир эмийг энэ сараас эрүүл мэндийн даатгал төлдөг иргэдэд үнэ төлбөргүй олгож эхэллээ. Засгийн газар, төр хувийн хэвшлийн байгууллагууд хамтран 2020 онд элэгний С вирусээс бүрэн ангижирсан дэлхийн анхны улс болох зорилт бүхий “Элэг бүтэн Монгол” үндэсний хөтөлбөрийг хэрэгжүүлэн ажиллаж байна. Үүний хүрээнд элэгний С вирусийн эсрэг Ледвир эм нь 2016 оны 4-р сарын 29-нд албан ёсоор Монголын эмчилгээнд хэрэглэгдэж эхэлсэн бөгөөд өнөөдрийг хүртэл 9000 гаруй хүн энэхүү эмийн эмчилгээнд хамрагдаж өвчнөө эмчилжээ.