Энэ сарын 15-наас нийслэлийн төв зам дагуух долоон уулзварт зүүн эргэхийг хориглосон шийдвэр хэрэгжиж эхэлсэн. Зүүн эргэхийг хориглосны улмаас туслах замуудад нь түгжрээ ихээр үүсэх болсон Бөхийн өргөөний уулзварын асуудлыг шийдэхийг Хотын захирагч С.Батболд өнгөрсөн долоо хоногт холбогдох албаныханд үүрэг болгосон. Тиймээс замын хөдөлгөөний ачааллыг харгалзан Бөхийн өргөөний уулзвараар зүүн эргэдэг болгох шийдвэрийг нийслэлийн удирдлагууд гаргахаар болжээ.