МУГТ Г.Өсөхбаяр Дэлхийд өндрөөрөө хоёрдугаарт эрэмбэлэгддэг Пакистаны К2 оргилд авирч эхэллээ. Энэхүү оргил нь хамгийн эрсдэл өндөртэй бөгөөд сүүлийн гурван жилд нэг ч хүн очоогүй юм. Тэгвэл манай уулчин энэ сарын 26, 27-нд оргилд гарахаар төлөвлөж буйгаа сансрын холбооны утсаар дуулгасан байна.

Манай уулчны авиралт хийхээр зорьсон уг оргилд цаг агаарын нөхцөл муу байгаа учраас оргилд гарахаар төлөвлөж байсан дэлхийн шилдэг уулчид буцаад байгаа ч манай тамирчин буцахаас татгалзаж, ийнхүү үндсэн авиралтаа өнөөдөр эхлүүлж буй талаар өөрийн цахим хуудсаараа дамжуулан мэдээллээ. Тэрбээр “Майхнаасаа толгой цухуйлгах аргагүй шуурч байгаа ч цаг агаарын байдал сайжрах хүртэл хүлээнэ” хэмээлээ.