Кыргызстаны нийслэл Бишкек хотноо Азийн залуучуудын аварга шалгаруулах тэмцээн зохион байгуулагдаж дүнгээ гаргалаа. Тус тэмцээнд манай улсаас залуучуудын ангилалд эрэгтэй 10, эмэгтэй 3 бөх зодоглож нэг алт, хоёр мөнгө, нэг хүрэл медаль хүртсэн амжилтаар багаараа зургадугаар байр эзэллээ. Тухайлбал, тэмцээний сүүлийн өдөр буюу өчигдөр эрэгтэйчүүдийн -100 кг-д ОУХМ О.Хангал  алтан медаль хүртлээ. Тэрбээр тэгштгэлд Японы Кайки Ямашитаг нэмэлт цагт цэвэр ялсан.  Хэсгийн аваргын төлөө Тайваний Лин Чан Кенийг 2:38 минутад иппон буулгасан байна. Улмаар хагас шигшээд Узбекистаны Артём Багдасаровыг 2:30 минутад хоёр вазаригаар давамгайлж яваад цэвэр ялжээ. Аваргын төлөөх барилдаанд Тажикстаны Тэмүр Рахимовыг 3 вазари үнэлгээ аван тивийн аварга боллоо. Тэрбээр Японы "Итай" сургуулийн оюутан юм.