Энэ сарын 1-ний өдөр Японы сумо бөхийн холбооны ТУЗ-ийн хурал болж, Томозүна дэвжээний оякатагаар Кёкүтэнхо Цэвэгнямыг томилохоор шийдвэрлэжээ. Зургадугаар сарын 12-ны өдөр тус дэвжээний ояката Томокүна 65 нас хүрч, тэтгэвэртээ гарсан бөгөөд түүний залгамж халаагаар ийнхүү Кёкүтэнхо томилогдсон байна.

Тэрбээр тус дэвжээний 11 дэх, Японы сумо бөхийн дэвжээний анхны монгол гаралтай ояката болжээ. Н.Цэвэгням 2005 онд Японы иргэн болохдоо нэрээ Оота Масарү (太田勝) болгон сольж, 2012 оны 5 сард дээд зиндаанд анх удаа түрүүлж, хамгийн өндөр настайдаа анхны түрүүгээ авсан бөх болсон юм.