ОХУ-ын Тувагийн нийслэл Кызыл хотод чөлөөт бөхийн “Төв Ази”  39 дэх удаагийн тэмцээн болж өндөрлөлөө. Тэмцээнд Монгол, Тувагаас гадна ОХУ-ын Красноярск, Кемерово, Хакас, Новосибирск, Буриадын нийт 150 гаруй тамирчин эрэгтэйчүүдийн найман жинд өрсөлдсөн юм. Манай улсаас МЧБХ-ны удирдах зөвлөлийн гишүүн, Тува улсын гавьяат тамирчин, улсын заан Дамирангийн Бумбаяраар ахлуулсан Азийн аварга ОУХМ Д.Хүдэрбулга, "Монголиа Опен" ОУТ-ий медальт Б.Нямдорж, Б.Сүхбат, М.Билгүтэй, Г.Чойгажид тэргүүтэй манай улсын 10 гаруй тамирчин уг тэмцээнд хүч үзсэн байна. Үүнээс 97 кг жинд “Женко” клубийн тамирчин, спортын мастер Мөнхжаргалын Билгүтэй хүрэл медаль хүртлээ.