Өнгөрсөн долоо хоногт УИХ олон нийтийн газар, авто зам, орон сууцны орчим, гудамж талбайд бие зассан, эсхүл нус, цэр, тамхины иш хаясан бол олон нийтийн газарт биеэ зүй бусаар авч явах гэж үзэн, торгох хууль баталсан билээ.

“Зөрчлийн”хэмээн нэрлэгдэж байгаа энэ  хууль ирэх долдугаар сарын 1-нээс хэрэгжинэ. Харин хэрүүл маргаан үүсгэсэн, бусдыг өдөөн хатгасан, бусдын амгалан тайван байдлыг алдагдуулсан, олон нийтийг илтэд үл хүндэтгэсэн, дарааллын журмыг зөрчсөн, бусдын эд хөрөнгийг эвдэж, сүйтгэж, гэмтээж биеэ авч явах зэргээр нийтээр хүлээн зөвшөөрөгдсөн хэм хэмжээг зөрчсөн бол танхайрах зөрчил хэмээн үзэхээр болжээ.

Түүнчлэн мансууруулах, сэтгэцэд нөлөөлөх бодисыг хадгалсан, байр саваар хангасан, тариалсан гэх мэт үйлдлүүдтэй холбоотой Эрүүгийн хуулийн зохицуулалтыг тусгаж өгчээ. Харин мансуурах зорилгоор хий, цавуу үнэрлэж байгаа үйлдлийг зөрчилд тооцож, хариуцлага хүлээлгэхээр тусгасан байна. Хуульд заасан заавал мэдэх чухал заалтуудыг хүргэе.

• Хурд хэтрүүлбэл 50000₮, урсгал сөрвөл жолоодох эрхийг нь 3 сараар түтгэлзүүлнэ
• Тээврийн үзлэгт ороогүй иргэн 20000₮, хуулийн этгээд 50000₮-ний торгууль ногдуулна.
• Халаасны хулгай хийвэл, согтуу машин жолоодох, гэр бүлээ айлган сүрдүүлж дарамталбал баривчлах шийтгэл онооно.
• Явган зорчигч улаан гэрлээр гарвал 25000₮-өөр торгоно.
• Гудамжинд бие засах, нус цэр, тамхины иш хог хаявал 10000₮-ний торгууль ногдуулна
• Хуурамч дуудлага, мэдээлэл өгсөн бол учруулсан хохирлыг нөхөн гаргуулж 50000 төгрөгөөр торгоно
• Биедээ хутга мэс авч явбал 25000 төгрөгөөр торгоно.
• Хүн гүтгэж, худал мэдээлэл олон нийтийн сүлжээ, мэдээллийн хэрэгслээр тараасан иргэн 2 сая төгрөг, хуулийн этгээд 20 сая төгрөгийн торгууль төлнө.
• Банкны үйл ажиллагааг тусгай зөвшөөрөлгүй эрхэлсэн бол хууль бусаар олсон хөрөнгө, орлогыг хурааж хувь хүнийг 10 сая төгрөгөөр, хуулийн этгээдийг 100 сая төгрөгөөр тус тус торгох юм.